وأبتدا المشوار !!!

السلام عليكم ورحمة الله وبركاته

وبعد 4 سنين جامعه و 11 سنه قبلهم

وبعد أيام المذاكره الرهيبه دي
واللي إكتشتفت فيها إن الواحد يقدر في يوم يزاكر منهج 3 شهور

أحب أقوووول

لقد هَرِمنا ... هَرِمنا

من اجل هـــــــذه اللحظة التاريخية

أخر إمتحان فيكي يا حاسبات
وأهو إبتدا المشوار الطويــــــــــــــل !
والشده عليك يارب .

ياااااه فعلاً كانت أيام غريبة والحمد لله أهي عدت بخيرها وشرها
بس بجد الواحد قابل نااااااس محترمه جدا جدا وقمة في الأخلاق.
واستفدت منهم بشكل كبير غير نظرتي لحاجات كتير .
وبرده الواحد قابل ناس أتمني من ربنا ما أشوفش وشهم تاني خااااااااالص .

مش عارف أوصف إحساسي فرحان ولا زعلان !
زعلان إني هسيب ناس زي ما بيقولوا بقوا عـِـشرَه عمر -4 سنيــــن -
بس فرحان جدا إني هبدأ الحياه العملية
وفرحان برده إني هبدأ إن شاء الله أحقق أهدافي الصغيره والكبيره.
واللي كانت ظروف الدراسه تمنعني إني أهتم بيها.

ربنا ينول كل طالب خير مراده.
ويوفقنا يارب في حياتنا ويوفقنا في خدمة دينا في شغلنا.
اللهم آميـــــن
سلام عليكم

كنت محتاج وقفه

السلام عليكم ورحمة الله وبركاته

طبعا اليومين دول الواحد إحتاج جدا انه يقف مع نفسه وقفه صدق وصراحة وإن وصل الأمر للمحاسبة.
فأصبح - والحمد لله - بقي يفكر ف مليون حاجة
لدرجه انه شيل نفسه الهم بدري
ودخل نفسه في موود ربنا وحده الأعلم بيه
وعشان كده نحن قررنا اننا نوقف عن التفكير مؤقتا
إلي حين الإحساس بالهدوء ولو شويه .

ولكن للأسف حصل ما لا يحمد عقباه
لأنه لما تجبر نفسك انك تنسي شيء بالعافيه
فــ من دون ان تدري - وغصب عن عينك - بتفكر فيه اكتر من الأول.
وبتحس بكبت رهيب مش عارف إزاي تخرج نفسك منه
وتسأل نفسك أنا ليه بقيت كده ؟!!
وهل ده قدرمن الله ولا بلاء ولاإبتلاء !!!
وهل ربنا بيعاقبني ولا شايلي الخير
وهل أنا إستعجلت شويه النتيجة ولا إيه بالظبط؟

ولكن بعد التفكير الطويل, والبحث الجزيل
ولقيت انه الفرد منا في أوقات الشد والضغط اللي عايشين فيها حاليا
وانه أي مشكله أو أي أمر محتاج مشورة أو تقرير مصير
لازم نواجه بذهن صافي وعون من الله وتوفيق كبير
ولذا قررنا السير علي بعض الخطواط وابتاع منهج بسيط جدا ويسير

أولا نقف علي المرض.
تخيل إذا أصبت بمرض معين ووصفلك الدكتور دواء معين لفترة محددة
فأكيد - إنتا معايا -فـ انك لن تترك يوما إلا وأخذت فيه الدواء
فما بالك بدواء من رب العالمين ومن وصفه هو ربنا سبحانه وتعالي
أه هو القرآن لازم يكون لك ورد منه جزء يوميا (ثلث ساعه تقريبا قراءة)
ربنا قال "وننزل من القرآن ماهو شفاء ورحمة للمؤمنين"
وسبحان الله القرآن علاج نفسي وعضوي
ولكن محتاج ثقة بالله وإيمان راسخ ما بيتهزش أبدا مهما إتأخرت الإجابه.
" وَشِفَاءٌ لِمَا فِي الصُّدُورِ وَهُدًى وَرَحْمَةٌ لِلْمُؤْمِنِينَ"
فليه دايماً بندور علي دوائنا بره القرآن ؟؟؟
عشان كده مش لازم نهجر القرآن
سواء تلاوة واستماعاً وتدبراً وتطبيق علي قدر استطاعتنا

والوصفه الثانيه من النبي صلي الله عليه وسلم
وهي الدعاء
لأن الدعاء مخ العبادة وربنا بيغضب من العبد اللي مش بيدعي
وبيحب يسمع صوت عبده بيدعيه بإلحاح,
ولأن مش بيرد القضاء بتاع ربنا غير الدعاء فهو وسيلة قويه جدا.
زيها زي الإستغفار والأدعيه كتيـــر ومن أجملها.
دعاء فك الكرب "اللهم اجعل القرآن العظيم ربيع قلوبنا,
ونور صدورنا, وجلاء احزاننا, وذهاب همومنا وذنوبنا
اللهم اجعلنا من الذين يتلونه أناء الليل وأطراف النهار,
اللهم اجعله حجة ً لنا لا علينا اللهم اجعله شافعا ً لنا يوم القيامة".

آخيراً موضوع الإستعجال.
فيه قاعدة تانيه بسطية وهي زي ما بيقولوا
لا تعبر الجسر قبل الوصول إليه
كل واحد منا بيحلم بأشياء كتيـــرة معظمها جميـــل
ولكن للأسف الخطأ الي بنقع فيه - وأنا منهم - الإستعجال بجني ثمار الحلم ده
والهم والحزن من عدم وجود أي ثمرة واحده منه
تقدروا تقولوا كده أحلام يقظه!!
فالأجدر إننا بقي أكثر واقعيه

والأهم نعمل اللي علينا وبما يرضي الله
فإذا إجتهدت ولم تجد نتيجة فكن علي يقين تام انه أكيد ربنا شايل الخير عاجلا أم آجلا
واللي كاتبه ربنا لينا مهما كان الأمر ده - في إعتقادنا - خير أو شر مهما فعلنا مش هنغيره.
وطبعا "كلٌ ميسر لما خلق له"
فكل اللي بيحصل بإرادة ربنا ولغاية يا إما خير لينا يا إما شر
فلازم نكون عندنا حسن ظن بالله لان ربنا عند ظن عبده
فأكيد كل اللي بيحصل بإراده ربنا وآخرته خير لينا إن شاء الله
ربنا ييسرلنا أمر طاعته ويهدينا إلي سواء الصراط

لانه تخيل لو عصي الواحد ربنا في شيء وأغضبه
وبعدين يشيل هم عدم إستجابته سبحانه وتعالي
مش معايا انه ده تبجح في الطلب وسوء أدب مع الله.
فأهم شيء تقيس به سعادتك في الدنيا والآخرة هو مقدار قربك من الله سبحانه وتعالي فعلا وقولا
و القرب مش هو الإعتزال عن الناس,
لكن هومخالطة الناس بما يرضي الله و اننا نعيش الدنيا وهي في إدينا
ودايما عنينا علي الآخره.من وجد الله فماذا فقد ومن فقد الله فماذا وجد ؟!

والأهم في كله ده يتلخص في بيت بيقول
من كل شيء إذا ضيعته عِوَضٌ *** وما من الله إن ضيعته عوضُ

كل ده ماهو إلا تذكير لنفسي وإياكم
ربنا يوفقنا في دراستنا وحايتنا وفي أمر ديننا
ويرزقنا التقي والعفاف والغني....
سلام عليكم

كن عن همومك معرضاً

السلام عليكم ورحمة الله وبركاته

إبتهال جميــــــــــل جدا
دايما بفتكره لما الواحد بيحس بضيق
ودايما بصبر بيه والدتي




كن عن همومك معرضاً *** و كِل الأمورَ إلى القضا

و أبشر بخيرٍ عاجل *** تنسى به ما قد مضى

فلربما وسع المضيقُ *** و ربما ضاق الفضا

ولرُبَّ أمرٍ مغضبٍ *** لك في عواقبه رضا

الله يفعل ما يشاء *** فلا تكن متعرضا

الله عودك الجميل *** فَقِس على ما قد مضى


لــ صفي الدين الحلي

وده الإبتهال بصوت الكروان الشيخ طه الفشني



ربنا ما يجيب لحد ضيق
ويجعل أيامنا كلها سعادة ورضا :)
سلام عليكم

القراءة منهج حياة

السلام عليكم ورحمة الله وبركاته

بما ان الواحد مخنوق جدا من المشاريع اللي شبه هيسلم دوكيمنتيشن بس
وخلاص الواحد حاسس انه قفل ومابقاش قادر يزاكر او يعمل اي حاجه
فكنت مضطر أغير الجو شويه

وانا خارج من الجامعه عديت علي مكتبة القدس
ولقيت كتيب صغير اسمه
"القراءة منهج حياة"
للدكتور راغب السرجاني

كتاب خفيف ولطيف ومفيد جدا صحح عندي شوية مفاهيم مغلوطه عن القراءة
إداني دوافع نبيله جداً وجديدة للقراءة
وطريقة جعل كل لحظة وانا بقرأ في ميزان حسناتي.

ومن أجمل الفصول فيه هو فصل "كيف أحب القراءة"
أنصحكم وبشدة لقراءته....
الدكتور راغب حدد عشر وسائل هامة ربنا هيعينا بها على حب القراءة، وهي:
1. استحضار النية
2. وضع خطة للقراءة
3. تحديد وقت ثابت للقراءة واستغلال الفراغات البينية
4. التدرج
5. الجدية
6. التنسيق للمعلومات والنظام في كل شيء
7. تكوين مكتبة متنوعة في البيت
8. نقل ما تقرأ إلى الغير
9. التعاون مع أصحابك وإخوانك في القراءة
10. النقل من العلماء

الكتاب 48 صفحة بالفهرس
وثمنه رخيص جدا 2.5 تقريباً
خلصته في مشوارين للجامعه وانا في العربية
يعني مش هيكمل ساعة قراية او ساعتين بالكتير.
اللي مش هيعرف يشتريه ده لينك ليه
القراءة منهج حياة - راغب السرجاني

وطبعا أحسن حاجة في الموضوع اني كل ما بتضايق أقعد أقرأ
نصيحة هامة: وعن تجربه كل ما تحس بضيق أو تعب أمسك أحسن كتاب بتحبه وأقراه
احسن كتاب عندي هو صيد الخاطر
والأدب الصغير والأدب الكبير لابن المقفع
وكل كتب الدكتور خالد ابو شادي

نراكم علي خير في كتاب جديد ويوم جديد
سلام عليكم

أشكو إلي الله

السلام عليكم ورحمة الله وبركاته



سبحان الله - نـُـلام إن أمرنا بالمعروف ونهينا عن المنكر :(
حسبي الله ونعم الوكيل !!!

قال صلي الله عليه وسلم "من أرضى الله فِي سخط النَاس رضي الله عنه،
ومن أرضى الناس في سخط الله سخط الله عليه وأسخط عليه الناس".

يا الله يا الله
الواحد دلوقتي يتهم بإنه مثير فتن ورجعي ومتخلف بس لأنه قال
قال الله قال رسوله ونهي عن شيء ما يرضيش ربنا.

إنما أشكو بثي وحزني إلي الله :(
الله المستعان

سلام عليكم

طبـع إبـن آدم

السلام عليكم ورحمة الله وبركاته

طبـع إبـن آدم الطمـع, والحقــد أصبـح ماليــه
وافتكر ان الدنيـــا مــش مخلوقـــه غيـــر ليــــه
عَجبي عَليــــك ! .. دانتا طلعـت صحيح جبــــار
اليـــوم إرضـى بقليلــه, تصبـح بكـره تلاقيـــه
عجبي !!!!


مش عارف شكلها كده رباعيه !!!
ما عليــنا, يارب تكون صح بس وتركيبها مظبوط,
كــُـتـِـبت منذ قليل.

ســـلام عليــــكم.

حــُــب وحيــــاة

السلام عليكم ورحمة الله وبركاته
عجبتني جداً جداً



بس كده
سلام عليكم